काठमाडौं– नेपाल विद्युत् प्राधिकरणले डेडिकेटेड फिडर र ट्रंक लाइनबाट विद्युत् आपूर्ति लिएका तर प्रिमियम महशुल नबुझाएका उपभोक्तालाई आगामी मंसिर १२ गतेभित्र बक्यौता रकम बुझाउन आग्रह गरेको छ ।
प्राधिकरणले बिहीवार एक सूचना जारी गर्दै बक्यौता रकम बुझाउन बाँकी रहेका उद्योगलाई तोकेको समयभित्र बक्यौता रकम बुझाउन आग्रह गरेको हो । मन्त्रिपरिषद् बैठक र सञ्चालक समिति बैठकको निर्णयअनुसार नै १५ दिनभित्र बक्यौता तिरिसक्न प्राधिकरणले उपभोक्तालाई आग्रह गरेको हो ।
‘वितरण केन्द्रहरूबाट सम्बन्धित उद्योगको २०७२ माघदेखि २०७५ वैशाखसम्म टीओडी मिटरमा रेकर्ड भएको डिमान्ड तथा टी–वान, टि–टु र टि–थ्री टाइम इन्टरभलमा रेकर्ड भएको खपत इनर्जीको आधारमा गणना गरिएको छुट बिल प्राप्त गर्नुभएको छ, अतः उक्त बिल अनुसारको बक्यौता महसुल १५ दिन अर्थात २०८१ मंसिर १२ गतेभित्र सम्बन्धित वितरण केन्द्रमा बुझाउनुहुन अनुरोध गरिन्छ,’ प्राधिकरणद्वारा जारी सूचनामा भनिएको छ ।
तोकिएको समयमा बक्यौता महसुल भुक्तानी नभएमा नियमानुसार कारबाही गरिने प्राधिकरणले जनाएको छ । प्राधिकरणले प्रिमियम महशुलको बक्यौता नबुझाउने २८ उद्योगमा बिजुली काटिदिएकोमा मन्त्रिपरिषद्को निर्णय अनुसार मंगलबारदेखि पुनः जोडिदिएको छ । प्राधिकरणले तिनै उद्योगहरुका लागि सूचना जारी गरेको हो ।
