तम्घास (गुल्मी)– जिल्लाको धुर्कोट गाउँपालिका–६, रजस्थलका एउटै व्यक्तिले ४०० मुरी धान फलाएका छन् । स्थानीय मेघनाथ अर्यालले सो परिमाणमा धान फलाएका हुन्। यति धेरै धान फलाउने अर्याल जिल्लामै एक्लो व्यक्ति हुन् । हालसम्म उनले ३०० मुरी धान खेतबाट उठाइसकेका छन् । सय मुरी उठाउन बाँकी छ ।
‘हालसम्म ७५ रोपनी क्षेत्रफलमा लगाएको ३०० मुरी धान उठाएका छौं, अब २५ रोपनीको करिब सय मुरी उठाउन बाँकी छ । धान काटेर सुकाउन राखेको छु । अब थ्रेसर लगाएर धान र पराल छुट्याउन मात्रै बाँकी छ,’ अर्यालले भने । उनले सय रोपनीमध्ये ७२ रोपनी आफ्नो र २८ रोपनी भाडामा लिएर धानखेती गरेका हुन्। भाडामा लिएको जग्गाको वार्षिक प्रतिरोपनी तीन हजारका दरले बुझाउँदै आएको अर्यालले बताए।
यसरी उत्पादन गरिएको धानबाट चामल बनाउने र प्याकेजिङ गरेर बेच्ने उनको योजना छ । ‘पहाडमा सधैं तराईबाट चामल आउने भएकाले त्यसलाई रोक्न पनि गाउँमै मिल स्थापना गरी चामल बिक्री गर्ने योजना छ,’ उनले भने, ‘मिलका लागि राज्यले सहयोग गरे त धेरै सहज हुने थियो ।’
धान खेतीका साथै उनले व्यावसायिक भैंसीपालन पनि गरेका छन् । उनीसँग अहिले २१ वटा माउ भैंसी, एउटा ठूलो राँगो र १४ वटा पाडापाडी छन् ।
उत्पादन भएको धान चामललाई ब्रान्डिङ गरी बिक्री गर्ने र भुस भैंसीको आहारका रूपमा प्रयोग गर्ने योजना बनाइरहेको अर्यालले बताए। धान काटेलगत्तै उक्त जग्गामा मकैखेती, घाँस वा अन्य तरकारी लगाउने उनले सुनाए ।
धुर्कोट गाउँपालिकाका अध्यक्ष भुपाल पोखरेलले एउटै किसानले यति धेरै परिमाणमा धान उत्पादन गर्नुले गरे के हुँदैन भनेर अरुलाई पनि राम्रो सन्देश दिएको बताए। यस्ता किसानलाई प्रोत्साहनका लागि पालिकाले आवश्यक सहयोग गर्ने उनको प्रतिबद्धता छ । ‘मेघनाथले मिल स्थापनाका लागि सहयोग पाए हुन्थ्यो भन्ने गरेको सुनेका छौं । यसमा लागत साझेदारी गर्न पालिका तयार छ । धुर्कोटमै चामल मिल स्थापना हुनु पालिकाको लागि गौरवको विषय हो नि,’ अध्यक्ष पोखरेलले भने ।
कृषि ज्ञान केन्द्रका प्रमुख नवराज भण्डारीले गुल्मीमा उत्पादित चामललाई ‘ब्रान्डिङ’ गर्नुपर्ने बताए। गुल्मी जिल्लाभर यसवर्ष सात हजार हेक्टरमा बर्खे धान लगाएकामा २१ हजार मेक्ट्रिक टन उत्पादन भएको उनले जानकारी दिए ।
