काठमाडौं– म्याग्दी सदरमुकाम बेनीबाट भारतको राजधानी नयाँदिल्लीसम्म सिधा बस सेवा सुरु भएको छ । मोडर्न इरा टुर्स एन्ड ट्राभल्स र सृष्टि यातायात प्रालिले बुधबार उक्त बससेवा सुरु गरेका हुन् । उक्त बस बेनीको कालीपुल बासपार्कबाट स्याङ्जा, वालिङ, भैरहवा, अयोध्या, आग्रा हुँदै नयाँ दिल्ली पुग्ने बताइएको छ ।
बस सेवाको शुभारम्भ बेनी नगरपालिकाका प्रमुख सुरत केसीले गरेका थिए। म्याग्दी र मुस्ताङका धार्मिकस्थललाई भारतसँग जोडेर भारतीय पर्यटक भित्र्याउन यो बस सेवाले महत्त्वपूर्ण भूमिका खेल्ने मोडर्न इरा टुर्स एन्ड ट्राभल्सका अध्यक्ष केशवप्रसाद अधिकारीले बताए ।
‘बेनीदेखि दिल्लीसम्म २७ घण्टामा यात्रा गर्न सकिन्छ,’ उनले भने । ‘बेनीबाट हरेक दिन बिहान ६ः४५ बजे र दिल्लीको सरोजनी नगरबाट साँझ ४ः०० बजे बस छुट्नेछ ।’ बेनीबाट नयाँ दिल्लीसम्मको प्रतियात्रु शुल्क ५ हजार ४०० रुपैयाँ र नयाँ दिल्लीबाट ३ हजार २०० भारु भाडादर कायम भएको छ ।
बसको क्षमता ४५ जनाको रहेको छ । बेनी–दिल्लीको दूरी १ हजार ४०० किलोमिटर छ । यस सेवाबाट म्याग्दी, बागलुङ, पर्वत र मुस्ताङका सर्वसाधारण लाभान्वित हुनेछन् । यसअघि म्याग्दीबाट भारत जान पोखरा पुगेर गाडी चढ्नुपर्ने अवस्था थियो ।
बेनी नगरपालिकाका प्रमुख केसीले दिल्लीसँग म्याग्दीको यातायात सम्पर्क स्थापना भएपछि पर्यटक विकासमा पनि सहयोग पुग्ने बताए। म्याग्दीको गलेश्वरधाम, पुलहआश्रमका साथै मुस्ताङको मुक्तिनाथ मन्दिरको दर्शनका लागि आउने भारतीय पर्यटकलाई बस सेवाबाट सहज हुने नगर प्रमुख केसीले बताए ।
सृष्टि यातायात प्रालिका अध्यक्ष कृष्णप्रसाद पौडेलले नेपाल–भारतमैत्री बस सेवा कार्यक्रमअन्तर्गत दिल्लीदेखि कालीगण्डकी कोरिडोरको सडक भएर म्याग्दी हुँदै चीनको सिमानामा रहेको कोरला नाकासम्म यातायात सञ्चालनका लागि पहल गरिएको बताए ।
मुस्ताङको मुक्तिनाथ मन्दिरमा वार्षिक एक लाख जनाभन्दा बढी भारतीय दर्शनका लागि आउने गरेका छन् । म्याग्दीबाट रोजगार, शिक्षा, उपचारसहित अन्य विभिन्न कामले भारत जाने यात्रुलाई भारतीय क्षेत्रमा रेलमा लाग्नेभन्दा निकै सस्तो भाडा, लुटिने जोखिमसमेत कम हुने यातायात व्यवसायी ऐनबहादुर शाहीले बताए ।
–––
