दोहा– हमासको सशस्त्र समूहले गाजामा आफ्नो नियन्त्रणमा रहेका ४८ बन्धकको ‘अन्तिम तस्बिर’ सार्वजनिक गरेको छ । इजरायली सेनाले गाजाको सबैभन्दा ठूलो सहरी केन्द्रलाई नष्ट गर्ने र कब्जा गर्ने क्रम जारी राखेपछि यस्तो तस्बिर बाहिर आएको अरब क्षेत्रको लोकप्रिय सञ्चार माध्यम अल जजिराले जनाएको छ ।

शनिबार कस्साम ब्रिगेडले अनलाइनमा एउटा सामूहिक तस्बिर पोस्ट गरेको छ, जसमा जीवित र मृत सबै बन्धकहरूको अनुहार देखाइएको छ । तीमध्ये प्रत्येकलाई सन् १९८६ मा लेबनानमा बेपत्ता भएका इजरायली वायुसेनाका कप्तान रोन आरादको सन्दर्भमा ‘रोन आराद’ भनेर लेखिएको छ । आरादको एफ–४ फ्यान्टम जहाज दक्षिणी लेबनानमा आक्रमण गर्ने क्रममा तोकिएको समयअगावै बम विस्फोट भएपछि दुर्घटना भएको थियो । उनलाई पहिले अमल मुभमेन्टले कब्जा गरेर पछि हिजबुल्लाहलाई हस्तान्तरण गरिएको थियो । आरादको मृत्यु भएको विश्वास गरिए पनि त्यसको ठोस प्रमाण उपलब्ध छैन ।

हमासले जारी गरेको तस्बिरसँगै एउटा लेख पनि थियो, जसमा भनिएको थियो– नेतान्याहुको इन्कारी र जामिरको आत्मसमर्पणका कारण गाजा सहरमा सैन्य कारबाही सुरु हुँदा यो अन्तिम तस्बिर हो ।

यो इजरायली प्रधानमन्त्री बेन्जामिन नेतन्याहुले गाजामा भइरहेको युद्धलाई अन्त्य गर्न हमाससँग कुनै पनि सम्झौता गर्न बारम्बार अस्वीकार गरेको र इजरायली सेना प्रमुख इयाल जामीरको नेतृत्वमा भइरहेको स्थल र हवाई आक्रमणको सन्दर्भमा भनिएको थियो, यद्यपि उनले गाजा सहर कब्जा गर्ने सरकारको योजनाप्रति सार्वजनिक रूपमा असहमति जनाएका थिए ।

इजरायली अधिकारीहरूले करिब २० बन्धकहरू गाजामा जीवितै रहेको विश्वास गरिएको बताएका छन्, जबकि संयुक्त राज्य अमेरिकाका राष्ट्रपति डोनाल्ड ट्रम्पले २० भन्दा कम जीवित हुन सक्ने बताएका छन् । ट्रम्प र नेतान्याहुले जीवित र मृत सबै बन्धक फिर्ता ल्याउने र हमासलाई नष्ट गर्ने बताएका छन् ।

हमासले इजरायलको हवाई र स्थल आक्रमणले बन्धकहरूको जीवन जोखिममा पार्ने भन्दै निरन्तर चेतावनी दिँदै आएको छ । केही बन्धकहरू त इजरायली बमबाटै मारिएको पनि बताइएको छ । प्यालेस्टिनी सशस्त्र समूहले बन्धकहरू गाजा सहरका ‘छिमेकी इलाकाहरूमा छरिएका’ छन् भन्ने पनि दाबी गरेको छ ।

हमासले शनिबार यस्तो धम्की दिएको केही घण्टाअघि मात्रै तेल अभिभ र अन्य सहरका सडकमा लाखौं इजरायलीले सरकारको विरोध गर्न र युद्ध अन्त्य गर्न तथा सबै बन्धकहरूलाई फिर्ता ल्याउन तत्काल र व्यापक सम्झौताको माग गर्दै प्रदर्शन गर्ने अपेक्षा गरिएको थियो ।

यसै महिनाको सुरुमा हमासले दुई जना इजरायली बन्धकहरूको भिडियो सार्वजनिक गरेको थियो । यो कदम अर्को दुई जना दुब्लाएका इजरायली बन्धकहरूको फुटेज प्रसारण गरेको लगभग एक महिनापछि आएको हो, जसमध्ये एक जनाले आफ्नो चिहान आफैं खनिरहेको देखाइएको थियो ।

यी तस्बिरहरूले बन्धकहरूका परिवारका साथै इजरायली सरकारी अधिकारीहरू, अमेरिका र अन्य इजरायली सहयोगी राष्ट्रहरूमा आक्रोश पैदा गरेको थियो ।

गाजाको प्यालेस्टिनी स्वास्थ्य मन्त्रालयका अनुसार, अक्टोबर २०२३ मा युद्ध सुरु भएयता इजरायलद्वारा कम्तीमा ६५,२०८ प्यालेस्टिनी मारिएका छन् र १,६६,२७१ जना घाइते भएका छन् । मार्च १८ मा इजरायलले हमाससँगको युद्धविराम तोडेपछि १२,६५३ जनाको मृत्यु भएको छ र ५४,२३० जना घाइते भएका छन् ।

इजरायलले गाजामा भोकमरीको अवस्था सिर्जना गरिरहेको बेला पछिल्लो एक दिनमा कम्तीमा चार जना सहायता खोज्ने व्यक्ति मारिएका छन् र १८ जना घाइते भएका छन्, जसले गर्दा मारिने प्यालेस्टिनी सहायता खोज्नेहरूको कुल संख्या २,५१८ पुगेको छ ।

पछिल्लो दिन गाजा सहरमा दर्जनौं मानिस मारिएका छन्, घरहरूमा आक्रमण र नष्ट गरिएका छन्, र हजारौं मानिसहरूलाई भाग्न बाध्य पारिएको छ । इजरायलले सम्पूर्ण इलाकालाई युद्ध क्षेत्र घोषणा गरेको छ ।