काठमाडौं– सांसदहरुले सांसद विकास कोषका नाममा सांसदलाई बजेट बाँडेर बदनाम नगराउन सांसदले अर्थ मन्त्रालयको ध्यानाकर्षण गराएका छन् ।
प्रतिनिधिसभाको आजको बैठकको विशेष समयमा सांसद राजेन्द्रकुमार केसीले सांसद विकास कोषका नाममा सांसदलाई बदनाम नगर्न माग गरे। सांसद कोषका नाममा ३४ अर्ब छुट्याउने तयारी भनी आएको समाचारप्रति असन्तुष्टि व्यक्त गर्दै उनले सांसदलाई उनीहरुका क्षेत्रका योजना पहिचानमा सहभागी गराउन आग्रह गरे ।
चालु आर्थिक वर्षमा १४ खर्ब रुपैयाँ राजस्वको अनुमान गरिएकामा हालसम्म अहिलेसम्म साढे ९ खर्ब पनि नउठेकाले पपुलिस्ट बजेट नल्याउन पनि उनले सुझाव दिए । बजेट निर्माणमा कर्मचारीको हालीमुहाली छ भन्ने चर्चा अहिले आएकाले यस्तो हुने वातावरण नबनाउन पनि उनले माग गरे।
सांसद सूर्यप्रसाद ढकालले नेपाली युवालाई विदेश नपठाई स्वदेशमै उत्पादनमा लगाउनेगरी बजेटको व्यवस्था गराउनुपर्ने माग गरे। कृषिप्रधान देश नेपाललाई कृषिमा आत्मनिर्भर बनाउनेगरी बजेट आउनुपर्ने माग पनि उनको थियो ।
सांसद रामकृष्ण यादवले नागरिकको अपेक्षाअनुसार सरकारको गति अघि बढ्नुपर्नेमा जोड दिए। संसद् र सांसदको क्षमता एवं मूल्यमान्यता बढाउनुपर्नेमा जोड दिँदै उनले कृषि क्षेत्रमा बिचौलियालाई निरुत्साहित गर्ने गरी बजेट ल्याउन माग गरे । वैकल्पिक राजमार्गका लागि बजेट व्यवस्था गरी शीर्षक नकाट्न सांसद यादवले अनुरोध गरे।
पूर्वाधार निर्माणका काम रातको समयमा गरी छिटो सक्नेगरी व्यवस्था गरिनुपर्ने पनि उनको भनाइ थियो ।
