काठमाडौं– आज देभभर बदली हुने जल तथा मौसम विज्ञान विभाग अन्तर्गतको मौसम पूर्वानुमान महाशाखाले जनाएको छ । पश्चिमी वायुका साथै अरब सागरमा बनेको न्यून चापीय प्रणालीको प्रभावले आज देशभर साधारणतया बदली रहने महाशाखाको अनुमान हो ।
आज दिउँसो गण्डकी, लुम्बिनी प्रदेश र कर्णाली प्रदेशका केही स्थान तथा बाँकी प्रदेशका पहाडी तथा हिमाली भूभागका केही स्थानमा मध्यम हिमपात र वर्षा हुने महाशाखाद्वारा जारी मौसम बुलेटिनमा उल्लेख छ ।
बाँकी तराईका १–२ स्थानमा हल्का वर्षाको सम्भावना रहेको पनि महाशाखाले जनाएको छ । बागमती ,गण्डकी र कर्णाली प्रदेशका उच्च पहाडी तथा हिमाली भू–भागका १–२ स्थानमा भारी हिमपात र वर्षाको पनि सम्भावना छ ।
त्यसैगरी आज राति कोशी, बागमती, गण्डकी, लुम्बिनी र कर्णाली प्रदेशलगायत बाँकी पहाडी भूभागमा साधारणतया बदली रही तराई भूभागमा आंशिक बदली रहनेछ ।
गण्डकी प्रदेशका केही स्थान तथा बागमती, लुम्बिनी र कर्णाली प्रदेशका पहाडी तथा हिमाली भूभागका केही स्थान तथा कोशी प्रदेशलगायत बाँकी पहाडी तथा हिमाली भूभागका १–२ स्थानमा मध्यम हिमपात र वर्षाको सम्भावना छ । बागमती र गण्डकी प्रदेशका उच्च पहाडी तथा हिमाली भूभागका १–२ स्थानमा भारी हिमपात र वर्षा सम्भावना महाशाखाले औंल्याएको छ ।
