काठमाडौं– सार्वजनिक खरीद अनुगमन कार्यालयले आठ निर्माण व्यवसायी र आपूर्तिकर्ता कम्पनीलाई दोस्रोपटक स्पष्टीकरण सोधेको छ । ठेक्का सम्झौता अनुसार काम नगर्ने ती कम्पनीलाई कालोसूचीमा राख्न नपर्ने कुनै कारण भए सात दिनभित्र लिखित स्पष्टीकरण पेस गर्न भनिएको हो ।

सार्वजनिक खरीद अनुगमन कार्यालयका अनुसार हेटौंडा उपमहानगरपालिका–११, मकवानपुरको गुण निर्माण सेवा, काठमाडौंको सिरुवा–कविर–सुनकोसी जेभी, पर्सा जानकीटोल–४ को मुस्कान सप्लायर्स, बानेश्वर–१० को अनुष्ठान कन्स्ट्रक्सन, तीनकुनेको सिरुवा कन्स्ट्रक्सन कम्पनी प्रालि, वीरगञ्जको दिल्ली ट्रेडिङ र चितवनको जय गढीमाई निर्माण कन्स्ट्रक्सनलाई स्पष्टीकरण पेश गर्न भनिएको छ ।

यी निर्माण व्यवसायी तथा आपूर्तिकर्तालाई कालोसूचीमा राख्नका लागि विभिन्न निकायले खरीद अनुगमन कार्यालयलाई पत्राचार गरेका थिए । सोही पत्रका आधारमा खरीद अनुगमन कार्यालयले कालोसूचीमा राख्न नपर्ने आधार–प्रमाण भए ३० दिनभित्र लिखित स्पष्टीकरण पेश गर्न यसअघि नै सूचना जारी गरेको थियो । तर, यी कम्पनीले हालसम्म पनि लिखित स्पष्टीकरण पेश नगरेकाले दोस्रोपटक स्पष्टीकरण सोधिएको बताइएको छ ।

ठेक्का सम्झौताअनुसार काम नगर्ने यी कम्पनीसित सात दिनभित्र लिखित स्पष्टीकरण मागिएको छ । स्पष्टीकरण चित्तबुझ्दो नआए कालोसूचीमा राखिने कार्यालयको भनाइ छ ।

प्रतिक्रिया

सम्बन्धित खवर