काठमाडौं– राजस्व अनुसन्धान विभागले भन्सार छली गरी झन्डै ४० करोड रुपैयाँ बराबरको मालवस्तुको चोरी पैठारी गरेको आरोपमा विभिन्न फर्म तथा व्यवसायीहरूविरुद्ध मुद्दा दायर गरेको छ ।
विभागले उनीहरुविरुद्ध बिगो असुल गरी बिगो बराबरको ७९ करोडभन्दा बढी रकम असुल गरी हदैसम्मको कैद सजाय माग दाबीसहित उच्च अदालतमा मुद्दा दर्ता गरेको विभागका सूचना अधिकारी नवराज अधिकारीले जानकारी दिए ।
उनका अनुसार सन्दीप ट्रेडर्सका मुख्य कारोबारी दयाशंकर चौधरी र उक्त फर्मका प्रोपाइटर विमलावती चौधरीले सबैभन्दा बढी राजस्व छली गरेको पाइएको छ । उनीहरूविरुद्ध बिगो मूल्यांकन गर्दा १२ करोड ८५ लाखभन्दा बढी बिगोबराबरको राजस्व छली गरेको निष्कर्ष निकाल्दै बिगोबराबरको जरिवाना र हदैसम्मको कैद सजाय माग गरी सोमबार मुद्दा दर्ता गरिएको हो ।
उक्त ट्रेडर्सको कारोबारसम्बन्धी कागजात तथा विवरण विश्लेषण गर्दा २०७९ भदौदेखि २०८० भदौसम्ममा भिसिटिएस प्रणालीमा प्रविष्टी गरेको विवरणमा ६ लाख ४९ हजार ४०० रुपैयाँ बराबरको मालवस्तु खरिद गरेको देखिएको तर भन्सार प्रज्ञापनपत्र लगायत अन्य विश्वसनीय स्रोतबिना नै करोडौंका मालवस्तु विक्री गरेको देखिएको अधिकारीले बताए । उक्त ट्रेडर्सले भन्सार चोरीपैठारी गरी राजस्व चुहावट (अनुसन्धान तथा नियन्त्रण ऐन) २०५२ को दफा ३ ले निषेध गरेको कार्य गरेको पाइएको विभागको दाबी छ ।
यस्तै अन्य प्रतिवादीहरु गुरु इम्पेक्सका प्रोपाइटर सीताराम रौनयार, शुभश्री इन्टरप्राइजेजका रिजवान अन्सारी, न्यु कञ्चन इन्टरप्राइजेजका मीराकुमारी श्रीवास्तव, एसपी कन्सर्नका प्रभुशंकर रौनियार न्यु एसकुमार इन्टरनेसनलका रामछत्री कलवारले गरेको कारोबारका सम्बन्धमा छानबिन गर्दा राहुल दुवेदीसहितका ती फर्मका प्रोप्राइटरहरु तथा भारतीय नागरिकसमेतको मिलेमतो र संलग्नतामा ठूलो परिमाणको मालवस्तु भन्सार छली मालवस्तु नेपाल भित्र्याई चोरीपैठारी गरेको पाइएको विभागको निष्कर्ष छ ।
विभागले प्रयोगमा ल्याएको भिसिटिएस प्रणालीमा राहुलकुमार दुवेदीले प्रविष्ट गरेको विवरण र आन्तरिक राजस्व विभागले सञ्चालन गरेको प्रणालीमा प्रविष्ट गरेको विवरणबाट प्राप्त भ्याट रिटर्न अनुसन्धान तथा विश्लेषणमा विभागले उक्त तथ्य पत्ता लगाएको हो ।
भन्सार छली तथा मालवस्तु चोरी पैठारीको आरोपमा विभागले राहुलकुमार दुवेदीको हकमा १७ करोड ३८ लाख, सीताराम रौनियारको हकमा १ करोड ८२ लाख, रिजवान अन्सारीको हकमा २ करोड ११ लाख, मीराकुमारी श्रीवास्तवको हकमा २ करोड ११ लाख, प्रभुशंकर रौनियारको हकमा १ करोड ७८ लाख र रामछत्री कलवारको हकमा १ करोड ७७ लाख रुपैयाँ बिगो बराबरको भन्सार छली गरेको निष्कर्षसहित मुद्दा दर्ता गरिएको विभागले जनाएको छ ।
