पोखरा– पर्यटकीय राजधानी पोखराका होटलले पर्यटकलाई लक्षित गरी नयाँ वर्षमा होटलको दररेटमा २० प्रतिशत छुट दिने भएका छन् ।
नेपाली संस्कृतिको संरक्षण, नेपाली खाना तथा आन्तरिक एवं बाह्य पर्यटन प्रवर्द्धन गर्ने उद्देश्यले होटल संघ पोखराले पर्यटकीय लेकसाइडमा गर्न लागेको २०औं फेवा नववर्ष महोत्सव २०८१ बारे जानकारी दिन आज आयोजित पत्रकार सम्मेलनमा उक्त जानकारी दिइएको हो ।
यही चैत ३० देखि आगामी वैशाख १ गतेसम्म फेवा किनारमा गर्न लागिएको उक्त महोत्सवमा नेपाली खाना तथा मौलिक संस्कृतिको प्रचारप्रसार एवं पर्यटन प्रवर्द्धन गरी पर्यटकको बसाइ लम्ब्याइने संघका अध्यक्ष लक्ष्मण सुवेदीले जानकारी दिए । देशको अर्थतन्त्र सुस्ताएको अवस्थामा अर्थतन्त्र चलायमान बनाउन महोत्सवले सहयोग पुर्याउने जानकारी दिँदै उहाँले महोत्सव सम्पन्न गर्न ५० लाख खर्च लाग्ने बताउनुभयो । ‘जाउँ है पोखरा’ अन्तर्गत संघले घुमघाम पोखरा, शैक्षिक भ्रमण पोखरा, मधुमास पोखरा जस्ता सहुलियत प्याकेज पनि पर्यटकका लागि घोषणा गरेको छ ।
महोत्सव सम्पन्न गर्न २१ ओटा समिति गठन गरिएको जानकारी दिँदै उनले महोत्सव स्थलमा विभिन्न सांस्कृतिक कार्यक्रम, लोक दोहोरी, खेलकुद, पर्यटक दौड, पप कन्सर्ट, कृषि एवं हस्तकलाका सामग्री प्रदर्शनी गरिने बताइएको छ । महोत्सव पोखराको ड्यामसाइटबाट खहरेसम्मको तीन किलोमिटर दुरीको सडक तथा फेवाताल किनारमा हुनेछ ।
पोखराका होटलमा ४० हजार पर्यटक क्षमता भएकामा हाल स्वदेशी तथा विदेशी गरी ४० प्रतिशत ‘अकुपेन्सी’ पुगेको अध्यक्ष सुवेदीले जानकारी दिए । पोखरा महानगरपालिकाले सन् २०२५ लाई पोखरा भ्रमण वर्ष घोषणा गरेसँगै यतिवेला आन्तरिक एवं भारतीय पर्यटकको संख्या बढेको छ ।
