हेटौंडा– नुवाकोटका कांग्रेस नेता बहादुरसिंह लामा बागमती प्रदेशको मुख्यमन्त्री बन्ने भएका छन् । केन्द्रमा सत्ता समीकरण बदलिएपछि लामाले मुख्यमन्त्री बन्ने अवसर पाएका हुन् ।
बागमती प्रदेश सभामा नेपाली कांग्रेस संसदीय दलका नेता बहादुरसिंह लामाले सोमवार प्रदेशको मुख्यमन्त्री पदमा दाबी पेस गर्दैछन् । प्रदेश प्रमुख यादवचन्द्र शर्माले मुख्यमन्त्री शालिकराम जम्कट्टेलको राजीनामा स्वीकृत गर्दै नयाँ सरकार गठन गर्न आह्वान गरेसँगै नेपाल कम्युनिस्ट पार्टी (एमाले)को समर्थनमा नेता लामाले मुख्यमन्त्रीमा दाबी पेस गर्न लागेका हुन् ।
यसअघि एमालेलगायत दलहरुको समर्थनमा नेकपा (माओवादी केन्द्र)को प्रदेश संसदीय दल नेता जम्कटेल मुख्यमन्त्री थिए ।
प्रदेश प्रमुख शर्माले संविधानको धारा १६८ को उपधारा २ बमोजिम सरकार गठनका लागि दलहरूलाई यही साउन ८ गते साँझ ५ बजेसम्मको समय दिएर दाबी पेस गर्न आह्वान गरेका छन् ।
‘दुई दलबीच पहिला नै मुख्यमन्त्रीमा कांग्रेसले दाबी पेस गर्ने सहमति भइसकेको छ,’ नेता लामाले भने, ‘नयाँ मुख्यमन्त्री चयनको प्रक्रिया सुरु भइसकेकाले आज बिहान १० बजे बहुमत प्रदेशसभा सदस्यहरूको हस्ताक्षरसहित प्रदेश प्रमुखसमक्ष मुख्यमन्त्रीको दाबी पेस गर्छु ।’
नयाँ राजनीतिक समीकरणअनुसार नयाँ सरकार गठनका लागि मार्ग प्रशस्त गर्ने भन्दै मुख्यमन्त्री जम्कट्टेलले प्रदेश प्रमुख शर्मालाई राजीनामा दिएका थिए । प्रदेश प्रमुख शर्माले मुख्यमन्त्री जम्कट्टेलको राजीनामा स्वीकृत गर्दै अर्काे सरकार गठन नहुञ्जेलसम्म उनलाई कामचलाउ मुख्यमन्त्रीको जिम्मेवारी दिएका छन् ।
