काठमाडौं– शिक्षा, विज्ञान तथा प्रविधिमन्त्री देवेन्द्र पौडलले पदकै लागि बादल (रामबहादुर) हरू एमालेमा गएको आरोप लगाएका छन् । नेकपा माओवादी केन्द्र जैमिनी नगरपालिका बागलुङले आइतबार आयोजना गरेको राजनीतिक तथा बैचारिक प्रशिक्षण कार्यक्रममा पौडेलले उक्त टिप्पणी गरेका हुन् ।
‘बादल, टोपबहादुरलाई पार्टीले सरकारमा पठाएको थियो,’ मन्त्री पौडेलले भने, ‘पार्टीलाई धोका दिइ पदकै लागि एमालेमा जानुभयो, अहिले माओवादीलाई सराप्दै हुनुहुन्छ ।’
आगामी स्थानीय तहको चुनावमा गठबन्धनका प्रयास भइरहेको भन्दै उनले पहिले आफू मजबुत हुनपर्ने बताए । ‘आफ्नो उम्मेदवार तयार गरी अघि बढ्ने कुरा पहिलो हो,’ मन्त्री पौडेलले भने, ‘आफ्नो पार्टी मजबुत भएपछि अन्य दल गठबन्धन गर्न आउँछन् ।’
देशको परिर्वतनका लागि माओवादीले दुःख, कष्ट र त्याग गरेको तथा प्राप्त उपलब्धिलाई संस्थागत गर्न गठबन्धन गरेको बताए ।
माओवादीको लामो संघर्षपछि आएको परिर्वतनमा अन्य पार्टीले रजाइँ गरेको उनको भनाइ छ ।
उनले अहिले समृद्धिको लागि समाजवादी क्रान्ति आवश्यक रहेकोमा जोड दिँदै माओवादीले ल्याएको परिवर्तनमा अन्य दलहरुले रजाई गरेको बताए ।
‘माओवादीको योगदानमा देशमा समानुपातिक प्रतिनिधित्व लगायत थुप्रै उपलव्धी भए, उपलव्धीहरु गुम्ने खतरा आएपछि गठबन्धनको आवश्यक भयो,’ मन्त्री पौडेलले भने, ‘माओवादीकै उपलव्धीमा टेकेर माओवादीलाई नै गाली गर्नेहरुको कमी छैन, संविधानता जनप्रतिनिधले कुँ गर्न मिल्दैन दुई–दुईपटक संविधान मिचेर संसद अन्त्य गर्नेले उल्टै ठूला कुरा गरेको सुहाउँदैन ।’
माओवादीले केन्द्रीय महाधिवेशनपछि गैरभौगोलिक सहित १० प्रदेशमा प्रशिक्षण सकिसकेको भन्दै पार्टीले कार्यसम्पादनका लागि कमाण्ड तयार परेको उल्लेख गरे । उनले समाजवादी क्रान्तिको लागि शक्तिशाली पार्टी निर्माणको संकल्प गरेको बताउँदै थप सक्रिय हुन कार्यकर्तालाई आग्रह गरे ।
प्रशिक्षण कार्यक्रममा राष्ट्रिय जनमोर्चाबाट विक्रम अचार्यसहितका युवा माओवादी केन्द्रमा प्रवेश गरेका थिए ।
